Қазақтың қыраны Талғат Бигелдинов туралы мақала

Қазақтың қыраны – Талғат Бигелдинов

Авторлар: Әл-Фараби атындағы ҚазҰУ,

Журналистика факультетінің студенттері

Темірбай Диана, Тулегенова Ажаранияза

Кеңесші: Әл-Фараби атындағы ҚазҰУ,

Қазақстан тарихы кафедрасының оқытушысы

А.Н. Сагинаева

Талғат Бигелдинов – қазақ халқының даңқты ұлы, жауынгер ұшқыш, екі мәрте Кеңес Одағының Батыры атағын алған қаһарман. Оның аты тек Қазақстанда ғана емес, бүкіл әлемнің әскери тарихында алтын әріптермен жазылған. Ол өзінің қайсар мінезімен, қажырлы еңбегімен және ерлігімен жауынгерлік рухтың символына айналды. Оның өмірі қиындықтар мен сынақтарға толы болды, бірақ ол әрқашан өз мақсатына жету үшін аянбай тер төкті. Бүгінгі ұрпақ үшін оның ерлігі – патриотизмнің, батылдықтың және табандылықтың үлгісі.

Талғат Бигелдинов 1922 жылы 5 тамызда Ақмола облысының Майбалық ауылында дүниеге келді. Қазақ даласында өскен бала ұшуға деген ерекше қызығушылық танытып, болашақта әскери ұшқыш болуды армандады. Сол кездегі авиация дамуы мен ұшқыштардың батылдығы оны шабыттандырды.

Балалық шағында ол үлкен ұшақтарды көргенде ерекше әсер алып, олардың көкке қалай көтерілетінін қызықтайтын. Бұл қызығушылық оны ұшқыш болу арманын жүзеге асыруға жетеледі. Жас Талғат өз мақсатына жету үшін табандылық танытып, 16 жасында Саратовтағы әскери авиация училищесіне оқуға түседі. Мұнда ол әуе техникасының қыр-сырын меңгеріп, ұшқыш болуға алғашқы қадамдарын жасайды.

Әл-Фараби атындағы Қазақ ұлттық университетінің «ҚазҰУ хабаршысы» журналында жарияланған Б.С. Сайланның зерттеуінде Т. Бигелдиновтың ұшқыш ретінде қалыптасу жолы жан-жақты қарастырылған. Автор оның бала кезіндегі арманы, авиацияға деген қызығушылығы және ұшқыш болу үшін жасаған қажырлы еңбегіне тоқталады.

Ұлы Отан соғысы және әуе шайқастарындағы ерлігі жайлы келетін болсақ, 1942 жылы Талғат Бигелдинов әскери ұшқыш ретінде Ұлы Отан соғысына аттанып, Ил-2 шабуылдаушы ұшағын басқарды. Бұл ұшақ әуе шайқастарында ерекше рөл атқарды және оны басқару үлкен шеберлікті талап ететін.

E-history.kz порталында жарияланған «Ажалмен бетпе-бет: Талғат Бигелдиновке 100 жыл» атты мақалада оның жауынгерлік ерліктері нақты сандармен келтірілген: ол 305 рет әскери тапсырмамен әуеге көтерілген, 7 жау ұшағын атып түсірген және көптеген жау техникасын істен шығарған.