Жақыпбек Махамбетов туралы мақала

Сыр өңірлік Кеңес Одағының Батыры –

Жақыпбек Махамбетов

Сыр елі Қазақстан тарихында аттары алтын әріптермен жазылған тарихи тұлғаларын мақтан етеді. Сыр бойының мақтан тұтатын перзенттерінің бірі Кеңес Одағының Батыры – Махамбетов Жақыпбек.

Жақыпбек Махамбетов

Сыр жері Қазақстан тарихының әр кезеңдерінде өз іздерін қалдырған тарихи тұлғаларды, батырларды, қоғам қайраткерлерін, ақын-жырауларды, жез таңдай әншілерді дүниеге әкелген құтты мекен. Сыр Ана өз перзенттерін алпыс екі тамырын иітіп, емірене емізсе керекті, өйткені Сырдың топырағынан нәр алып өскен ұлдары, бүгінде бүкіл қазақ халқының мақтанышына айналған бірегей ірі тұлғалар.

Жақыпбек Махамбетов сол ата-бабаларының жолымен екінші дүниежүзілік соғыс кезінде қазақ халқына тән ерліктің дәстүрін жалғастырды.

Екінші дүниежүзілік соғыс адамзат баласына үлкен қайғы қасірет әкелді. Ел басына күн туып, ер азамат етігімен су кешкен кезеңде Қазақстандықтардың Отанын қорғауға айрықша үлес қосқаны тарих беттерінен мәлім. Ел қорғауға қазақстандықтар белсене қатысып, майданда да, тылда да ерен ерліктің үлгі-өнегесін көрсетті. Жауға қарсы қан майданда кеудесін от пен оққа тосты. «Бәрі де майдан үші, бәрі де жеңіс үшін» деп өшпес ерлік өнегесін қалдырды.

Отанын қорғауға Сыр жерінен жетпіс мыңнан астам адам аттанды. Кескілескен ұрыс даласында Сыр елінің перзенттері де ерліктің үлгісін көрсетіп, жеңісті жақындатуға өз үлестерін қосты.

Махамбетов Жақыпбек 1912 жылы Қызылорда облысы, Сырдария ауданы, №9 ауылында дүниеге келді. 1929 жылдан бастап колхозда қатардағы колхозшы болды. Ж.Махамбетов тракторист курсына барып, 1935 жылы тракторист мамандығын алып, 1937 жылдан бастап трактор бригадасында Сұлутөбе МТС-да бригадир болып жұмыс істей бастады. Ж.Махамбетов өзінің туған ауылындағы «Кооператив» колхозын ұйымдастырушылардың бірі. Ол өз ауылдастарының ішінде алдыңғылардың бірі болып еліне қызмет етті.

Германдық фашист армиялары Отанымыздың қасиетті шекарасынан баса-көктеп өткен шақта Жақыпбек Махамбетов майданға жіберуді өтініп, әскери комиссариатқа талай келді. Бірақ механизаторлар тылда да қажет еді. Тек 1942 жылы ақпан айында ғана оның өтініші қабылданып, Қызыл Армия қатарына шақырылды. Салқын қанды, сабырлы, бар істе байыпты Жақыпбек күн өткен сайын өзінің жауынгерлік қабілетін өсіре түсті. Механизаторлық мамандығы бар қазақ солдаты станокты пулеметтің тілін тез игеріп алды. Аз күнгі әзірліктен соң Калининград майданындағы соғысқа кіреді. Ұлы Отан соғысы жылдары кіші сержант дала майданы 52-ші әскері 254-ші атқыштар дивизиясы 933-ші атқыштар полкінің пулеметшісі болды.

1943 жылдың қыркүйегі. Кеңестік Украинаны гитлершіл басқыншылардан азат ету ісін тезірек аяқтау үшін төрт майданның әскерлері Днепрді кешіп өтуге әзірлік жүргізді.

1943 жылдың 2 қазанында қарсыластың жойқын оғы астында Махамбетов қарсыласқа аяусыз шабуыл жасай отырып, өзінің пулеметінің дәл атылған оғымен 3 фашистің көзін жойып, немістің ірі калибрлі пушкасын көмекшісімен талқандап, бөлімше құрамымен Днепрдің оң жағалауына аман-есен өтті. 1943 жылдың 17-қазанында Крещатик деревнясында болған ұрыста ержүрек пулеметші…