Қазіргі заман мұғалімі қандай болуы керек эссе 2 сынып

Мұнайлы ауданы

«№13 мектеп-гимназия» КММ

Бастауыш сынып мұғалімі

Далуова Жансая Кемелқызы

Қазіргі заман мұғалімі қандай болуы керек?

Мен үшін ең қастерлі де, қасиетті мамандық ол – ұстаздық. Жақсылыққа бастайтын жарық жұлдыз - оқу. «Ұстаздық еткен жалықпас, үйретуден балаға» деп ұлы Абай атамыз айтқандай, ұстаздық жолды өз қалауыммен таңдап алдым. Сондықтан ұстаздық жолында адал міндет атқаруды өзіме мақсат етіп қойдым.

Аталған мақсатты жүзеге асыруда қиыны мен қызығы қатар жүретін еңбек жолындағы менің педагогикалық ұстанымым қалыптасты. Ұстаз деген кім? Ол үнемі жаңалыққа ұмтылып, алдыңғы қатардан көрінуші және әр оқушының бойынан жақсылық табу арқылы биік мақсаттарға жетелеуші. Сонымен қатар баланы жеке тұлға ретінде қабылдап, бәсекеге қабілетті өзін көрсете білетін тұлғаны қалыптастырушы. Ұстаз білімді, еңбекқор, бала жанын түсіне алатын болса ғана ұстаздық кәсіптің шыңына жете алады.

Жас ұрпақты өмірге дайындап, олардың «Сегіз қырлы, бір сырлы» талантты, білімді азамат болуы үшін тәрбиенің барлық түрін байланыстыра алуым қажет. Менің ұстанымымның мәні - сыни тұрғыдан ойлай білетін, ойлау қабілеттері дамыған, сауатты оқушы дайындау. Өз мамандығымның құндылығы ретінде өзімнің сыни тұрғыдан ойлап, жаңашыл идеялар арқылы білім нәрімен сусындатып отырған шәкіртімнің білімін жетілдіре отырып, жаңашылдыққа жаны құмар, заман ағымына ілесе алатын, бәсекеге қабілетті оқушы дайындап шығаруға басымдық беремін.

Мұғалім тек білім беруші ғана емемс, ол алдында отырған әр оқушының психологиясын зерттей отыруы қажет. Әр бір бала әр түрлі қалыптасқан, сондықтан олардың ішінде жеке жұмыс жұргізуді талап ететін оқушылар да кездеседі. Осындай оқушыларға демеу бере отырып топқа қосылуына әрекет жасауы керек.

Яғни мұғалімнің кәсіби шеберлігі жоғары болған жағдайда – білім сапасы да артады дегім келеді.