Технологиялық үдерістерді жобалау және вагон жөндеу сызбасы

Технологиялық үрдістерді жобалау

Вагон жөндеудің жалпы схемасы

Вагондардың көптеген түрлерінің конструкциялық ерекшелігі – олардың тетіктерінің едәуір бөлігін құю, ыстықтай немесе табақтық штампілеу, соғу, табақтық материал мен профильдерді қию әдістерімен дайындалған күйінде алынатыны. Кесу арқылы өңдеу тек кейбір тетіктерге ғана қолданылады. Сондықтан, жүк вагонын жасаудың жалпы үлгісін төмендегі технологиялық үрдістер тәртібінде қарастыруға болады:

дайындамалық цехтарда (құю, ұсталық, суықтай престеу цехтары) тетіктер мен дайындамаларды дайындап алу;

механикалық өңдеу цехтарында дайындамаларды кесу арқылы өңдеу;

термикалық цехтарда термикалық, термо-химикалық және басқа әдістермен өңдеу;

бөлшектерге жабындар (гальваникалық, полимерлік, т.б.) түсіру;

төменгі қатарлы технологиялық тораптарды құрастыру;

жоғарғы қатарлы тораптарды құрастыру;

вагонды жалпы құрастыру;

вагонды сырлау және ішін әрлеу;

вагонды сынау және тапсырушы өкілдеріне өткізу.

Жолаушы вагондары мен изотермиялық вагондар конструкциясы бойынша жүк вагондарына қарағанда анағұрлым күрделірек. Бірақ олардың жасалу схемасы шанақты жинау кезеңіне дейін жүк вагондарымен бірдей болуы мүмкін. Негізгі айырмашылықтар осы кезеңнен басталады. Бұл шуға қарсы, гидроизоляциялық, жылулық изоляцияға байланысты жұмыстарды, еден мен жабдықтарды құрастыру жұмыстарын жүргізбес бұрын металл шанақты алдын-ала сырлау қажеттігінен туындайды. Бұл жұмыстардан бұрын ағаштан, полимерлік материалдардан бөлшек жасау, жиһаз бірліктерін, электрлік және радио жабдықтарын дайындау жүргізілуі тиіс.

Вагон жөндеу схемасы жалпы алғанда келесі технологиялық үрдістерден тұрады: вагонды жөндеуге қабылдау және дайындау; жалпы вагонның ақауларын табу; бөлшектер мен жинақ бірліктерін ашып, ақауларын табу; бөлшектер мен жинақ бірліктерін жөндеу және қалпына келтіру; вагонды құрастыру және әрлеу үрдістері.

Технологиялық үрдістерді дайындау

Қандай да бір технологиялық үрдісті дайындау мәселесін шешу үшін өндірістің нақты жағдайларындағы өнімді жөндеудің оңтайлы нұсқасын табу қажет. Үрдістің тиімді нұсқасы болып, берілген өнімге өндірістік шығын ең аз жұмсалатын конструкторлық құжаттама талаптарына сай келетін нұсқа саналады.

Жалпы жағдайда технологиялық үрдісті жобалау 5-суретте көрсетілген өзара байланысты жұмыстар жиынтығын құрайды.

Бөлшектерді өңдеудің технологиялық үрдісін қарастыру үшін бастапқы құжат болып төмендегілер саналады: тетіктің жұмыстық сызбасы және оны жасаудың техникалық талаптары; бөлшектің жылдық шығару жоспары; аталған өнімнің дайындамасының сызбасы және оны жасаудың техникалық талаптары; жабдық туралы мәліметтер;…