Технологиялық үрдістердің топтамасы бойынша конспект

Технологиялық үрдістердің топтамасы.

Әрбір жұмыс түрлерінің технологиялық үрдістері олардың технологиялық құжаттардағы сипатталу дәрежесі және орындалуының ұйымдастырылуы бойынша ажыратылады.

Сипатталу дәрежесі бойынша маршруттық, операциялық және маршруттық-операциялық болып бөлінеді. Технологиялық үрдістерді әзірлеп қарастыру кезінде олардың әрқайсысы ең төмен дегенде технологиялық операциялар бойынша сипатталуы тиіс. Егер технологиялық үрдістің одан әрі сипатталуы қарастырылмаса, онда ол үрдіс маршруттық болып табылады. Ал егер де әрбір технологиялық үрдісті ауысымдары бойынша да сипаттау қажет болса, онда мұндай технологиялық үрдіс операциялық деп аталады. Маршруттық-операциялық технологиялық үрдістерде кейбір күрделі деген операциялар ғана ауысымдары бойынша сипатталады.

Ұйымдастыру әдістері бойынша технологиялық үрдістер бірліктік, типтік және топтық болып бөлінеді.

Бірліктік технологиялық үрдіс – бұл бір ғана бұйым атауының, орындауының және типтік мөлшерінің жасалу немесе жөнделуінің технологиялық үрдісі (4-өсті жартылай вагонның рамасын жинау және дәнекерлеудің технологиялық үрдісі, СА-З автотіркегіші корпусын жөндеудің технологиялық үрдісі, т.б.).

Типтік технологиялық үрдіс – бұл конструкциялық және технологиялық белгілері бірдей болатын бұйымдарды жасау және жөндеу техүрдісі.

Топтық технологиялық үрдістер конструкциялық белгілері әр түрлі, бірақ технологиялық белгілері бірдей болатын өнімдер жиынтығы үшін қарастырылады.

Технологиялық үрдістерді типтендіру:

Зауыттағы әртүрлі технологиялық үрдістерді жүйелендіруге және олардың көлемін шектеуге;

біртектенген құрал-саймандарды мейлінше көп қолдануға;

өңдеу үрдістерін механикаландыру және автоматтандыру құралдарын кеңінен қолдануға;

жаңа өнімдерді өндіруге дайындық мерзімі мен құнын едәуір қысқартуға мүмкіндік береді.

Технологиялық үрдістердің типтендірілуі өндіріс объектілерінің топтандырылуына негізделген, яғни, өндіріс объектілерін конструкциялық құжаттағы белгілері бойынша жеке топтарға бөлу жүргізіледі. Олар үшін ортақ технологиялық үрдістер ойластырылады. Тетіктерді ең көп қолданылатын мына топтарға бөледі: біліктер (валы) (осыған ұқсас осьтер, штоктар, саусақтар, істіктер (штырь), т.б.); төлкелер (сондай-ақ, ішпектер (вкладыш), гильзалар, с.с); дискілер (сондай-ақ, сақиналар, маховиктер, шкивтер, фланецтер-, с.с.); эксцентрикалық тетіктер (иінді біліктер, эксцентриктер, тағы с.с.), иінтіректер (осыған ұқсас бұлғақтар, тартымдар, сырғалар, с.с.); жалпақ тетіктер (тақталар, рамалар, үстелдер, станиналар, тақтайшалар, тағы с.с); тісті доңғалақтар; жүрістік бұрамалар мен червяктар, тіреулер.