Жаңа форматты педагогпын тақырыбындағы эссе үлгісі

«Мен жаңа форматты педагогпын»

«Ұстаз болу –даналық пен адамдық,

Содан ғана табылады адалдық.

Білім, сүйкім, тәлім-үлгі соларда,

Ешкім оған ойламайды жамандық» - деп ақындарымыз жырлағандай, ұстаз-даналықтың бастауы, шәкірт жанының бағбаны. Ұстаз болу кез келген адамның қолынан келе бермейтін, арқалар жүгі ауыр, жауапкершілігі жоғары, мол іс деп білемін.

Өмірде еш нәрсе кездейсоқ болмайды деуші еді, осы мамандыққа келуімнің өзі кездейсоқ нәрсе емес-ау сірә да! Мектепті жақсы үлгеріммен аяқтап, анамның қалауымен (өзім мұғалімдік мамандығын ұнатпадым) осы мамандықты күні кеше ғана тәмамдап, қолыма диплом алып, мұғалімдік қызметке орналасқан жас маман едім. Бүгінде «Өзін-өзі тану рухани-адамгершілік білім беру» бағдарламасы бойынша 3 деңгейлі курсты бітірген әжептеуір білікті маман болдым. Қызылорда қаласында оқыған курстан алған әсерім ол -өз алдына бөлек әңгіме. Дәріс берген ұстазымыз Жанат Акбарқызы менің мұғалімдік мамандыққа қызығушылығымды оятып, құлшынысымды арттырған бірден-бір жан деп есептеймін. Білім беру жолында және өмірде де үлгі тұтарлықтай адам екені сөзсіз және ол кісіге алғысым шексіз!

Елбасымыз: «Жaңa формaция мұғалімі- рухaни дaмыған әрі әлеуметтік тұрғыдaн есейген, педагогикaлық құрaлдардың бaрлық түрлерін шебер меңгерген білікті мaмaн, өзін-өзі әрдaйым жетілдіруге ұмтылaтын шығaрмaшыл тұлғa. Ол жоғары білімді шығaрмaшыл тұлғaны қaлыптaстырып, дaмыту үшін жaуaпты» - деп атап көрсетті.

«Ұстаздың абыройы болмаса-шәкірттері оның сақалымен ойнайды» деген Сайф Сараи. Мұғалім заман талабына сай, шығармашылықпен жұмыс істеп, білімі мен білігін үнемі жетілдіріп отыруы қажет. Алдымен баланы жан тәніңмен сүйіп, оның бойынан тек жақсы қасиеттерді көріп, жан дүниесіне терең үңіліп, баламен сырласып, оның сөзін құлақ қоя тыңдап, оның қойған сұрақтарына толық жауап беру – кемел мұғалімнің ісі дер едім. Осыдан кейін оқушыға қарап, өз бейнеңді көресің.

Сара Алпысқызының бастамасымен құрылған «Өзін-өзі тану» рухани пәнінен сабақ беру маған бұйырғанына дән ризамын. Себебі осы пәнді оқушыларыма оқыта жүріп, өз бойымдағы кемшіліктерді түзеп, рухани жаңардым деп айта аламын. Жалпыадамзаттық құндылықтарға негізделген, өмірмен тығыз байланысты бұл пәннің білім беру саласында алатын орны ерекше және қазіргі қоғамға ауадай қажет. «Өзін-өзі тану» рухани-адамгершілік бағдарламасының әлемде баламасы жоқ. Қазіргі адамзат баласы барлығын техникамен басқаратын заманға қол жеткізгенімен, жаһандық дағдарыс тоқтау алар емес. Ғалымдар бұл дағдарыстың шешімі рухани білімнің жетіспеуінен деген қортындыға келді. Сондықтан та осы пәнді тура басқа елдерде білім беру жүйесіне ендірсе деп ойлаймын. Сол кезде әлемдік жаһандану дағдарысы тоқтап, адамдар жер бетінде бір-бірімен тату әрі бақытты өмір сүрген болар ма еді?!...

Өз тәжірибемде ұлы ағылшын ағартушысы Уильям Уордтың мына бір сөзін ұстанамын: «Жай мұғалім хабарлайды, жақсы мұғалім түсіндіреді, керемет мұғалім көрсетеді, Ұлы мұғалім шабыттандырады...» Балаларды оқыта жүріп, өзің де біраз дүниені біліп қалады екенсің.…