Біздің топтағы өсімдіктер сурет салу конспектісі

«Еркетай» ортаңғы тобындағы ұйымдастырылған оқу қызметінің конспектісі

Білім беру саласы: «Шығармашылық».

Кіші сала: «Сурет салу».

Тақырыбы: «Біздің топтағы өсімдіктер» (поролон баспа таңбасы).

Мақсаты: Балаларға бейнелеу өнерінің жаңа әдісі - поролон губкасымен сурет салуды үйрету. Бейнелеу өнерінің бұл әдісі суреттің анық шығуына әсері болады. Бейнелеу өнері барысында балалар өсімдікті қорғауға, аялауға тәрбиеленеді және олардың эстетикалық талғамы мен ұқыпты жұмыс жасау қабілеттері қалыптасады.

Қос тілдік компонент: жасыл - зеленый, гүл - цветок, күз – осень.

Көрнекіліктер: Альбом парағы, жасыл гуашь, поролон губкасы.

Ұйымдастырылған оқу қызметінің барысы

1.Ұйымдастырушылық кезеңі

-Қазір жылдың қай мезгілі ?

-Дұрыс айтасыңдар,қазір күз мезгілі.

Күз мезгілі болғанда даладағы барлық өсімдіктер сарғаяды және олар жерге түседі.

Дұрыс па?!

Сондықтан, мен сендерге жұмбақ жасырамын:

Терезе алдында тұрады,

Адамдардың бәрі қызығады

Су құймасаң, сәні бұзылады

Ол не? (Бөлме гүлдері)

2. Негізгі бөлімі

-Біздің топта бөлме гүлдері бар ма?

-Дұрыс айтасыңдар, бар.

Бірақ, олар өте аз.

Біздің топта жыл бойы жаз болып, топта көп гүлдер болуы үшін бәріміз бүгін бөлме гүлдерінің суреттерін салайықшы.

-Бөлме гүлдерінің пайдасы туралы естеріңде ме? Бөлмеде не үшін көп гүлдер тұрады?

Қос тілдік компонент:

жасыл - зеленый, гүл - цветок, күз – осень.

-Біз қазір гүлдер салуды бастаймыз.

Бөлме гүлдерінің суреттерін ерекше тәсілмен бейнелеуді ұсынамын. Гүлдердің суреттерін кішкентай поролон губкасымен саламыз.

Егер губканы жасыл түсті бояуға малып, қарындашпен салынған гүл суретінің үстінен бастырсақ, гүлге көлем береді, гүлдің суреті үлкен және әдемі болып көрінеді.

Келесі кезеңде гүлдер арасында ашық жер қалдырмай, губкамен бастырамыз.

Қарындашпен салынған гүл суреті дайын болған кезде, оны губкамен үстінен бастырамыз.

Естеріңе саламын! Поролонды бояуға қатты батырмаңдар, бояудың үстінен аздап, жеңіл ғана бояу жағылатын болсын.

Балалардың тікелей жұмыс жасауы

3. Қорытынды

Жұмыстарын орындап болғаннан кейін өздері салған суреттерге қарайды.

Ұқыпты, әдемі салғандары үшін мақтау сөздер айтамын.

Көрме ұйымдастырамыз