Дауыссыз қ мен ғ дыбыстары ашық сабағы 1 сынып

Сабақтың мақсаты: Білімділігі: Дауыссыз Қ мен Ғ-ның

жазылу емлесімен таныстыру, дауысты дыбыс қосылғанда қалай өзгеріске ұшырайтынын түсіндіре отырып, сауаттылыққа жетелеу, мысалдар арқылы дәлелдей білуге үйрету, сөз ішінен қатаң, ұяң, үнді дыбыстарды ажыратуды үйрету. Дамытушылығы: Ой шапшаңдығын дамыту, сөздік қорын молайту, тиянақты жауап беруді талап ету. Тәрбиелігі: Әсемдікке, ұқыптылыққа баули отырып, бірлікке, ұжым ішінде ұйымшылдыққа тәрбиелеу.

Әдісі: Өз бетінше, жұппен, сұрақ-жауап.

Түрі: Саяхат.

Көрнекілігі: Жеміс-жидектер, ребус, көкөністер суреті, т.б.

Барысы:

І. Ұйымдастыру кезеңі. Психологиялық дайындық.

Мұғалім: Екі көз не үшін керек? Оқушы: Бар жақсылықты көру үшін. Мұғалім: Екі құлақ не үшін керек? Оқушы: Ақыл-кеңес тыңдау үшін. Мұғалім: Екі қол не үшін керек? Оқушы: Елге көмек беру үшін. Мұғалім: Екі аяқ не үшін керек? Оқушы: Шетте жүрсең, туған жерге жету үшін.

- Отырыңдар, балалар. Дұрыс айтасыңдар. Екі аяқ туған жерге жетіп, туған тілде сөйлеу үшін керек. Тіл туралы мен сендерге мына бір қызық нәрсені айтып беремін. Қане, тыңдап көрейік. - Өте ертеде бір қария дүниеден көз жұмарында қасына ұлын шақырып алып: « - Балам, менің дүниемен қоштасар күнім жақын. Өзіңе қалдырып бара жатқан бір

асыл қазынам бар. Сен соны іздеп тап, ұқыпты пайдалан, ұқсатып қолдан», - депті. Күндердің күнінде бала әке қалдырған қазынаны іздеймін деп, әбден шаршайды. Бірақ әкеден қалған қазына таптырмайды. Амалы таусылған бала ел ішіндегі көпті көрген қариядан ақыл сұрайды. « - Әкеңнің сөзі рас, балам. Оның саған қалдырған мұрасы – тіл. Ол сөзге шешен кісі еді ғой. Бәріміз де сөз асылын, сөз өнерін сенің әкеңнен үйрендік. Тілден қымбат қазына жоқ», - деп кемеңгер қария аталы сөздің шешуін айтты. - Иә, балалар, тіл – асыл мұра. Ол біздің ана тіліміз, арымыз.

ІІ. Ой ашар. - Ал, балалар, бүгін біз ана тіліміз қазақ тілі сабағын көңілді өткізейік.

Сұрақ – жауап.

Күз бейнесі. Саяхат сабағында бақшаға барып көкөністер жинайтындығын хабарлау. Оқушылардың назарын тақтаға аударту.

- Суретте қандай жыл мезгілі бейнеленген? - Күз мезгілі. - Күз дегенде қандай ой келеді? - Көкөністер жинайды, қысқа азық дайындайды, құстар жылы жаққа кетеді, күн қысқарып, түн ұзарады. - Қандай көкөністер жинайды? - Қияр, картоп, қызанақ, баклажан, бұрыш, қызылша, сәбіз, орамжапырақ, т.б.

«Құрастыр» ойыны.

Орамжапырақты пайдаланып, құрастыр ойынын ойнайық. Оқушыларға уақыт берілді, құрастырған сөздерін ауызша атайды. Әр сөзді атағанда орамжапырақтың жапырақтары алынады.

- Мына жапырақтарды тек асқа ғана қолданбайды, мұның емдік қасиеті де бар екен. - Балалар, мен неге көкөністердің ішінен асқабақ, қызанақ, орамжапырақтарды алдарыңызға әкеліп қойдым? - Айтылғанда Қ дыбысына аяқталып тұр.